GÜNEY AZERBAYCAN

Iranın Ruhaniyyət məhkəməsi Güney Azərbaycanın milli fəalı Höccətülislam Əzimi Qədimi bir il həbsə məhkum edildi

DAK informasiya mərkəzinin Güneydən aldığı məlumata əsasən Güney Azərbaycanın milli haqlarını müdafiə edən və buna görə də dəfələrlə İran şovinist mollaları tərəfindən həbs edilən və ağır işgəncələrə məruz qalan Höccətülislam Əzimi Qədim Qum şəhərinə Ali Ruhaniyyət məhkəməsi tərəfindən bir il həbsə məhkum edildi.

Hökmdə göstərilir ki, müttəhim Əbdüləziz Əzimi Qədim öncədən 2005-ci ildə ruhaniyyət məhkəməsi tərəfindən 10 il müddətinə ruhani libasını geyinməkdən məhrum edilmişdir. Bu hökmə etiraz edən Əzimi Qədim məhkəmənin qərarını pozaraq ruhaniyyət paltarını geyinməyi davam etmişdir. Bununla yanaşı müttəhim İran İslam hakimiyyətinə qarşı olan qruplarla iş birliyi etmiş İranın ərazi bütövlüyünü təhlükəyə salan pantürkist təfəkkürünü yaymaqda davam etmişdir. Ruhanilərin xüsusi məhkəməsi tərəfindən hakim Hüseyn Bəhrami Qum Ruhaniyyət məhkəməsinin 2-ci şöbə rəisi tərəfindən dəfələrlə həbs edilmə hökmü verilmiş, bir il müddətinə Təbriz həbsxanasına göndərilmiş, 5 il müddətinə Güney Azərbaycan ərazilərində sürgün edilmiş, 2006-cı ildə Təbriz həbsxanasında 6 ay həbs çəkdikdən sonra şərti azadlığa buraxılmış və son günlərdə yenidən Qum Ruhaniyyət məhkəməsi tərəfindən bir il həbsə məhkum edilmişdir.

Xatırladaq ki, Beynəlxalq Əfv Təşkilatı 24 avqust 2005-ci il, 4 may 2006-cı il, 27 oktyabr 2006-cı il üç ayrıca bəyanatla İran hakimiyyətinə müraciət etmiş və müraciətdə bildirmişdir ki, insan haqları və milli haqlarını tələb edən Əbdüləziz Əzimi Qədimə qarşı məhkəmə qərarı Beynəlxalq İnsan Haqlarına ziddir və bu qərarlar dərhal dayandırılmalı, ona qarşı qoyulan bütün qadağalar ləğv edilməlidir.

Güney Azərbaycan Milli Azadlıq Hərəkatının müqavimət simvolu olan Abbas Lisani Yəzd həbsxanasına sürgün edilə bilər

DAK informasiya mərkəzinin Güneydən aldığı məlumata əsasən hal hazırda Əhər həbsxanasında saxlanılan Abbas Lisani Yəzd həbsxanasına göndərilmək təhlükəsinin olduğunu bildirib. Bununla bağlı açıqlama verən Abbas bəyin həyat yoldaşı xanım Rüqəyya Əlizadə bu vəziyyətdən çox nigaranlıq keçirdiyini bildirmiş və rejimin bu qanunsuz qərarı inasan haqlarına zidd və qəsdən Abbas bəyin psixoloji işgəncə olaraq ona qarşı bir təzyiq vasitəsi hesab olunur.

Xatırladaq ki, Abbas Lisani Güney Azərbaycanın milli haqlarını müdafiə etdiyinə görə neçə müddətdir ki, şovinist fars molla hakimiyyəti tərəfindən həbs edilərək bu günə qədər ağır işgəncələrə məruz qalmış, fiziki və maddi təzyiqlərlə yanaşı ailəsinə və yaxınlarına da İran Təhlükəsizlik Nazirliyi tərəfindən təzyiqlər göstərilir.

Bu günə qədər Beynəlxalq İnsan Haqları təşkilatları dəfələrlə Abbas Lisanilə bağlı İran dövlətinə protokollar təqdim etmiş və o sənədlərdən Abbas Lisaniyə qarşı aparılan məhkəmə qərarları və onun həbsini pisləmiş və dərhal onun azadlığa buraxılmasını tələb edən qərarlar olmuşdur. Lakin diktator fars hakimiyyəti bu günə qədər Güney Azərbaycanın siyasi məhbusları ilə bağlı verilən bütün beynəlxalq sənədlər bu hakimiyyətə heç bir təsir etməmiş, əksinə Gümey Azərbaycanın mili fəallarına qarşı təzyqilər daha da artmaqdadır.

Beynəlxalq İnsan Haqları təşkilatları verdikləri qərarların İran dövlətindən qətiyyətlə istəməməkləri İran dövlətinə insan haqlarını kobudcasına şərait yaradır.

Əkbər Ələminin deputatlığa namizədliyi qeydə alınmayıb                       DAK informasiya mərkəzinin Güneydən aldığı məlumata əsasən Azərbaycan türklərinin hüquqlarının müdafiəçisi kimi tanınan millət vəkili Əkbər Ələminin deputatlığa namizədliyi qeydə alınmayıb. İran Mərkəzi Seçki Komissiyası azərbaycanlı deputatın martın 14-də keçiriləcək parlament seçkilərində iştirakına razı olmayıb. Buna səbəb millət vəkilinin müxalifətdə olması, Güney Azərbaycan türklərinin milli problemlərini tez-tez qabartması və onların haqlarını müdafiə etməsidir. Bundan əlavə, bir sıra şəxslər müvafiq orqanlara Əkbər Ələmi barəsində anonim məktublar göndəriblər. Hətta millət vəkilinin toxunulmazlıq səlahiyyəti bitdikdən sonra şikayət ərizələrinin veriləcəyi də gözlənilir. Çünki bəzi şəxslər onu gözdən salmağa və həbsinə çalışırlar.

NASİR ƏTAPURUN İRANDA TƏZYİQƏ MƏRUZ QALMASI XƏBƏRİ TAM TƏKZİB OLUNUR

«Televiziya Muğam Müsabiqəsi-2007»nin finalçılarından olan Nasir Ətapur bugünlərdə İrana gedərkən təzyiqlərə məruz qalması haqda Azərbaycan KİV-ində yayılan məlumatların heç bir əsası olmadığını vurğulayır.

Həmin məlumatlarda N.Ətapurun Tehran hava limanında hüquq-mühafizə orqanı əməkdaşları tərəfindən saxlanıldığı, dindirildiyi, ondan İranda Azərbaycan musiqisinin təbliği ilə məşğul olmayacağı, konsertlər verməyəcəyi barədə izahat alındığı bildirilib.

Güney Azərbaycanda da 20 yanvar faciəsi anıldı

DAK informasiya mərkəzinin aldığı məlumata görə İran Hakimiyyəti Aşura gününün qeyd olunmasını Güney Azərbaycanın bütün bölgələrində keçirilməsinə təzyiqlər göstərməyinə baxmayaraq Güney azərbaycanlılar xüsusilə Sulduz şəhərində şəhidlər məzarlığına toplaşan Sulduzlu milli fəallar Aşuranı qeyd etməklə yanaşı 20 yanvar faciəsini və Güney Azərbaycan milli azadlıq hərəkatının şəhidlərinə anım mərasimi keçiriblər.

İran Təhlükəsizlik Qüvvələri çoxlu sayda şəxsi paltarda polis məmurları tədbir iştirakçılarını kameraya çəkərək onları təhdid ediblər. Lakin buna baxmayaraq 20 yanvar faciəsi Quzey Azərbaycanın müstəqilliyinin təməlinin qoyulduğu gün kimi qeyd olunaraq bütün Azərbaycan yolunda canlarını fəda etmiş soydaşlarımızı əklillərlə yad etmişlər.

Bu tədbirdən qorxuya düşən İran Təhlükəsizlik və polis qüvvələri ciddi iş rejiminə keçərək Sulduzun bütün küçələrində və məzarlığa gedən yollarda hazır vəziyyətdə polis qüvvələri yerləşdirmişdir. Sulduzla yanaşı Güney Azərbaycanın Təbriz, Urmiyə, Zəncan və başqa şəhərlərində də 20 yanvar günü qeyd olunmuşdur.

"İranda türk dilinə qadağa soydaşlarımıza qarşı növbəti təzyiq vasitəsidir"

Ötən sayımızda İran Mədəniyyət Nazirliyinin öz nəzdində yeni bir mərkəz yaratdığı barədə məlumat vermişdik. Qurumun əsas vəzifəsi Azərbaycan türkcəsindəki sözlərdən geniş istifadənin qarşısını almaqdır. Artıq mərkəz Güney Azərbaycan şəhərlərində müxtəlif peşə sahibləri və ayrı-ayrı tacirlər arasında vərəqələr yayıb. Vərəqələrdə onlardan mağaza sahiblərindən türk adlarına qoyulmuş qadağaya riayət etmək tələb olunur. Hətta İranın Mədəniyyət Nazirliyinin yeni bir qərarıyla Güney Azərbaycanda uşaqlar üçün türk dilində nağıl və dastan kitablarının nəşrinə qadağa qoyulub. Nazirlik bununla bağlı ölkənin bütün bölgələrində, o cümlədən Güney Azərbaycanda fəaliyyət göstərən nəşriyyatlara xəbərdarlıq edib.

Xatırladaq ki, ötən ilin payızında da belə bir qadağa qoyulmuşdu. Həmin vaxt İran parlamentinin bəzi azərbaycanlı deputatlarının ardıcıl etirazları nəticəsində Daxili İşlər və Ticarət nazirlikləri mağaza adlarında türk sözlərindən istifadəyə qoyulmuş qadağanı ləğv etmişdi. Görəsən, İran rejiminin son günlərdə türk dilinə qarşı hücuma keçməsi nəyə işarədir?

Bununla bağlı DAK-ın Koordinasiya Mərkəzinin rəhbəri Əlirza Əmanbəyli ilə əlaqə saxladıq. O bizimlə söhbətində bildirdi ki, bu, fars-molla rejiminin Azərbaycan türklərinə qarşı yeni təzyiq vasitəsidir. Çünki Türk Dünyasının bir araya gəlməsi və türk dilinin inkişafı İran rejimini bərk qorxudur. Eyni zamanda, azərbaycanlılar bu ölkədə əhalinin böyük əksəriyyətini təşkil etdiyindən türk dilinin istifadəsi fars şovinistlərini narahatçılığına səbəb olur. Ona görə də müxtəlif üsullarla türkcənin hərtərəfli yasaqlanmasına çalışırlar. Hazırda Azərbaycan türkləri yalnız ərəb qrafikalı əski əlifbadan istifadə edə bilir. Onun sözlərinə görə, İran rejimi soydaşlarımıza qarşı dəfələrlə belə bir üsula əl atıb. Ancaq əksər vaxtlarda Azərbaycan türklərinin təpkisi nəticəsində geri çəkilib. Amma müəyyən müddətdən sonra yenidən gündəmə gətirirlər. Bütün bunlar isə siyasi oyundur, təzyiq vasitəsidir.

ABŞ-ın "BÖYÜK AZƏRBAYCAN" PLANI

"İraq parçalanacaq, Kürdüstan yaranacaq və onun sərhədləri Türkiyənin içlərinədək uzanacaq, İraqın bir hissəsi yeni yaranmış Böyük Azərbaycanın torpaqları olacaq". ABŞ-ın xarici siyasət və diplomatiya sahəsində ən nüfuzlu nəşrlərindən sayılan "The Athlantic Monthly" aylığının yanvar-fevral sayında dərc olunmuş "İraqdan sonra" ("After İrag") redaksiya məqaləsində belə deyilir.

Demokratik Partiyaya yaxınlığı ilə tanınan dərginin ən tanınmış yazarlarından olan Ceffri Qoldberqin müəllifi olduğu analitik yazıda Yaxın Şərq, Mərkəzi və Ön Asiya, habelə Cənubi Qafqazdakı proseslərin perspektivləriylə bağlı təxminlər yer alıb. Ərsəyə gəlməsində istefada olan general Ralf Petersin də iştirak etdiyi baş məqalədə bildirilir ki, Yaxın Şərqin xəritəsi artıq yenidən cızılır.

İRANIN ARAŞDIRMALAR MƏRKƏZİ XƏZƏR DƏNİZİNİN ADINI DƏYİŞDİRMƏK İSTƏYİR

İran İslami Şura Məclisinin (parlament) Araşdırmalar Mərkəzi Xəzər dənizinin adının dəyişdirilməsi tələbi ilə çıxış edib.

 «Media forum» saytının məlumatına görə, təklifi Araşdırmalar Mərkəzinə parlamentin deputatı, sənaye və mədən komissiyasının üzvü Ramazanəli Sadıqzadə göndərib. Araşdırmalar Mərkəzi təklifi bəyənib. Deputatın təklifinə mərkəzdən verilən cavab məktubunda bildirilib ki, İranın şimalında yerləşən bu böyük hövzəyə ölkədə hamı «Xəzər» desə də, beynəlxalq aləmdə o, «Caspian sea» (Kaspi dənizi) adlanır, ərəblər isə onu «Bəhr-ül-Qəzvin» kimi tanıyırlar.

İran Araşdırmalar Mərkəzi Xəzər dənizinin müxtəlif adlarla tanınmasına ehtiyac olmadığını vurğulayaraq qeyd edib ki, bu dənizə onun tarixi mənşəyinə uyğun ad seçilməlidir.

Mərkəz bundan əvvəl də Xəzər dənizinin adının dəyişdirilməsinə yönəlmiş bir-iki təşəbbüsün olduğunu xatırladıb: «Dənizin adının dəyişdirilməsi üçün ilk təşəbbüs 1997-ci ildə olub. O vaxt İranın Nazirlər Kabineti dənizin daha çox İranla bağlı olduğuna işarə edərək ona «Mazandaran dənizi» adını verib. Lakin 2000-ci ildə beynəlxalq müqavilə və münasibətlərdə hər hansı anlaşılmazlığın qarşısını almaq üçün İran prezidenti Məhəmməd Xatəminin müavini Məhəmmədrza Arif dənizin əvvəlki adının (Xəzər və Kaspian) yenidən bərpa olunduğu barədə bütün hökumət dairələrinə göstəriş göndərib və xariclə bağlanan müqavilələrdə həmin adlardan istifadə olunmasını tapşırıb».